КАРНЕВАЛ

На празникот „Прочка“ во Прилеп се одржува карневал кој од 2007 има меѓународен карактер. Меѓународниот прилепски карневал „Прочка“ е член на  на европската федерација карневалски градови FECC.
Тој е заснован на една стара традиција на касапите, кои „Прочка“ ја сметаат за свој еснафски празник.
Тие се маскираат како „Мечкари“ во сурови кожи и со лица - сурати, направени од црна чоја, заби од нерез и вепар, пулејки, монистра, брада и мустаќи обредно играат по домовите и улиците во придружба на зурли и тапани, гонејќи ги болестите и злите демони и осигурувајќи благосостојба, здравје и плодност.
На овој ден, на Прочка, целиот град е во знакот на смеата и добриот хумор. Насекаде се сретнувааат маскирани дружини и поединци кои подоцна се придружуваат на организираната поворка во центарот на градот.
Карневалот во Прилеп е познат по традиционалните маски изработени од природни материјали. Маските имаат различни содржини: Женидба на Крали Марко со Црна Арапина; Евро-жетва; Разиграни плодови; Прилепски мајмуни; Тутуно - драпачи; Оџачар на велосипед; Кокошка; Божица; Пијано; Стар Дркул; Караконџол, Вегетаријанка и многу други. Поголемиот дел од нив се оригинални со високи уметнички вредности и симболика.
Маските и маскираните дружини од Прилеп учествуваат на домашните и странските карневали, каде што имаат добиено повеќе награди и дипломи.
Секоја година на Булеварот „Гоце Делчев“ дефилираат над 1500 маскирани учесници во групни или поединечни маски. На карневалот учествуваат групи од Сопот, Бегниште, Кавадарци, Струмица, Вевчани, како и од  Србија, Хрватска, Црна Гора, Словенија, Бугарија и Албанија.

Покрај дефилето на маски, карневалот на своето свечено отворање нуди многу забава, концерти на познати музички sвезди и ликовната изложба, каде свои цртежи имаат учениците од сите основни и средни училишат во градов.
Првата награда за најубав цртеж-маска во 2009 му припадна на Љубиша Ристески од едукативниот центар Ангор, втората награда ја доби Танески Дејан од ОУ „ Пере Тошев„ – Дупјачани а третата награда му беше доделена на Деан Сулејманоски од ОУ „Добре Јованоски“.
Прва награда за најубав цртеж – маска доби Бришкоска Ивана од гимназијата „Мирче Ацев“, второ наградена беше Бурнеска Евгенија од СОУ “Ѓорче Петров“ а третото место и припадна на Јованоска Симона од гимназијата „Мирче Ацев“.
Исто така беа доделен и благодарници за најубав цртеж – маска на Ивана Тинтоска од ОУ “Блаже Конески“, Наумоски Виктор од СОУ “Ѓорче Петров“ и Самарџиоски Бојан од СОУ „Орде Чопела“.